paleo_txt=Mucho uos lo gradesco commo a Rey e a señor Por quanto esta cort fiziestes por mi amor Esto les demando ayfantes de carrion Por mis fijas quem dexaron yo non he desonor Ca uos las casastes Rey sabredes que fer oy Mas quando sacaron mis fijas de valençia la mayor Hyo bien las queria dalma e de coraçon Diles dos espadas a colada e atizon Estas yo las gane aguisa de varon Ques ondrasse con ellas e siruiessen auos Quando dexaron mis fijas enel Robredo de corpes Comigo non quisieron auer nada e perdieron mi amor Den me mis espadas quando myos yernos non son&